نیو کراچی، ترقیاتی کاموں کا آغاز، محمد یوسف نے افتتاح کردیا
ورلڈ بینک کے ماتحت ادارے کلک کا تعاون خوش آئند ہے، چیئرمین نیو کراچی ٹائون
ترقیاتی کاموں کی پائیداری کیلئے تمام محکموں یکجا ہوکر کام کرنے کی ضرورت ہے، گفتگو
کراچی (سٹی رپورٹر) نیو کراچی ٹائون میں ورلڈ بینک کے ماتحت ادارے کلک کے تعاون سے ترقیاتی کاموں کا آغاز، ترقیاتی منصوبوں میں انفرا اسٹرکچر اورپارکس کی بحالی کے ساتھ سرکاری اسکولوں کی عمارتوں کی تعمیر نو بھی شامل ہیں، یہ بات چیئرمین نیو کراچی ٹائون محمد یوسف نے تین ترقیاتی اور تعمیری منصوبوں کا افتتاح کرتے ہوئے کہی، اس موقع پر UC-10 کے چیئرمین فیصل قاری، ایڈیشنل ڈائریکٹر سینی ٹیشن مُشتاق احمد، سپرٹینڈنگ انجینئر بی اینڈ آر اشفاق حُسین، انچارج بی اینڈ آر فیصل صغیر، انجینئر بی اینڈ آر ساجد صدیقی و دیگرٹائون افسران بھی موجود تھے، محمد یوسف نے سیکٹر 11-G میں شیخ سعدی اسکول کے تعمیر نو کے منصوبے کا افتتاح کیا، واضح رہے کہ شیخ سعدی اسکول کی عمارت عدم توجہی کی وجہ سے خستہ حال ہوجانے کی وجہ سے 2014 سے تعلیمی سلسلہ بند ہوچکا تھا، نشہ کے عادی افراد نے اس اسکول کو اپنا مسکن بنا لیا تھا، ہمیں جب اختیار ملا تو نیو کراچی ٹائون کے بلدیاتی سرکاری اسکولوں کا دورہ کیا اور عمارتوں کی خستہ حالی کا جائزہ لیا، از سر نو تعمیر اور تزئین و آرائش کا بیڑا اٹھایا الحمد اللہ آج شیخ سعدی اسکول کی تعمیر نو کا آغاز ہو چکا ہے اور انشاء اللہ اس اسکول کی عمارت کو گرائونڈ پلس ون بنایا جائے گا جس کا کل رقبہ تقریباً 2000 اسکوائر فٹ ہے اور ہماری کو شش ہے کہ اس کی تعمیر مکمل کی جائے تاکہ تدریسی عمل کا آغاز جلد سے جلد ہوسکے، بعد ازاں چیئرمین نیو کراچی ٹائون نے کلک کے تعاون سے تعمیر کیئے جانے والے پردہ پارک کا دورہ کیا، جس کی تعمیر کے کام کا آغاز ہوچکا ہے، اس موقع پر محمد یوسف نے کہا کہ پردہ پارک اپنی نوعیت کا پہلا پارک ہوگا جو جدید طرز پر تعمیر کیا جائے گا جو خوبصورتی میں اپنی مثال آپ ہوگا اس پارک میں بچوں کیلئے جھولے اور خواتین کے لئے بہتر اور صاف ستھرا ماحول فراہم کیا جائے گا جہاں تفریح اور کھیل کے تمام مواقع میئسر ہونگے، جبکہ نارتھ کراچی سیکٹر فائیو ایم اور فائیو ایل کی درمیانی 4200 سڑک جو عرصہ دراز سے ٹوٹ پھوٹ کا شکار ہے اس کی تعمیر کا آغاز بھی کلک کے تعاون سے شروع ہو چکا ہے جو جلد مکمل کرلیا جائے گا، انہوں نے کہا کہ کلک کی جانب سے نیو کراچی ٹائون میں ترقیاتی منصوبوں کا آغاز خوش آئند اقدام ہے، ترقیاتی منصوبوں کی پائیداری کے لئے تمام محکموں کو یکجا ہوکر کا م کرنے کی ضرورت ہے، ہم نے نیو کراچی ٹائون میں مسائل کے خاتمے اور عوام کو بلدیاتی سہولیات کی فراہمی کا جو بیڑا اٹھایا ہے اللہ کی مدد سے جلد اس میں کامیابی نصیب ہوگی
